சென்னை சர்வதேசத் திரைப்பட விழாவின் 22ம் வருட தொகுப்பு 2024 டிசம்பர் 12 முதல் 19 வரை நடந்து முடிந்தது. ஒரு பங்கேற்பாளராக நான் கலந்து கொண்டது இதுவே முதல்முறை என்று சொல்லவே கூச்சமாக உள்ளது. 2015 சென்னை சர்வதேசக் குறும்பட விழாவில் எனது குறும்படமும் இடம்பெற்றது. அப்போது தான் இந்த விழாவின் ஒருங்கிணைப்பு குறித்து பரிச்சயம். ஆனால், ஏதோ காரணங்களால் முழுநீளத் திரைப்பட விழாவிற்குச் செல்லும் வாய்ப்பு அமையவில்லை. தொடர்ந்து ஒரு வாரம் அல்லது பத்து நாட்கள் நடப்பதால் கூட கலந்துகொள்ள முடியாமல் போயிருக்கலாம். ஆனால், இந்த முறை கலந்துகொண்டது பெரும் மகிழ்ச்சியையும் அனுபவத்தையும் கொடுத்தது.
உலகம் முழுவதும் திரைப்பட விழாக்கள் 1932 முதல் நடைபெற்று வருகின்றன. இந்தியாவில் 1952 முதல் கோவாவில் திரைப்பட விழா நடைபெற்று வருகிறது என்றாலும், தமிழ்நாட்டில் சென்னை சர்வதேசத் திரைப்பட விழா தொடங்கப்பட்டு 22 வருடங்களே ஆகின்றன.
இந்த முறை சென்னை சர்வதேசத் திரைப்பட விழாவில் உலகம் முழுவதும் உள்ள 50க்கும் மேற்பட்ட நாடுகளில் இருந்து பல்வேறு மொழிகளில் 100க்கும் மேற்பட்ட திரைப்படங்கள் திரையிடப்பட்டன. அவை, பி.வி.ஆர் சத்யம் மற்றும் சிட்டி சென்டர் ஐநாக்ஸ் ஆகிய இரண்டு திரையரங்கங்களில் உள்ள 6 திரையரங்குகளில் திரையிடப்பட்டன.
திரைத்துறையினர், மாணவர்கள் ஆகியோருக்கு 500 ரூபாய் நுழைவுக் கட்டணமும், பொதுமக்களுக்கு 1099 ரூபாய் நுழைவுக் கட்டணமும் பெறப்படுகிறது. விழாவிற்கு முன்பதிவு செய்து அடையாள அட்டை பெற வேண்டும்.
ஆறு திரையரங்குகளில் தினமும் 4 காட்சிகள் வீதம் 24 காட்சிகளும், 8 நாட்களில் சுமார் 100க்கும் மேற்பட்ட காட்சிகளும் திரையிடப்படுகின்றன. ஒருவரால் ஒரு நாளுக்கு 4 படங்களையும் அதிகபட்சமாக 8 நாட்களில் 32 படங்கள் வரையும் பார்க்க முடியும். இதனால், சில முக்கியமான படங்கள் ஒருமுறைக்கு மேல் திரையிடப்படுகின்றன. எனவே, பெரும்பாலானோர் அவற்றைப் பார்த்து ரசிக்க ஏதுவாக இருக்கும்.
திரையிடல் தவிர தினமும் காலை 9 மணி முதல் மதியம் 12 மணி வரை திரைத்துறை நிபுணர்களின் சிறப்பு வகுப்புகள் நடைபெறுகின்றன. இதில் சினிமாவின் பல்வேறு துறை சார்ந்த நிபுணர்கள் தங்கள் அனுபவங்களையும் சினிமாவின் தொழில்நுட்பங்கள் குறித்த வகுப்புகளையும் அதையொட்டிய கலந்துரையாடல்களையும் நிகழ்த்துகின்றனர். இவை சினிமாவிற்கான கற்றலை ஊக்குவிக்கிறது.
பொதுவான திரையிடல்களைத் தவிர சினிமா கலைஞர்கள் மற்றும் முக்கியஸ்தர்களுக்காகச் சிவப்புக் கம்பள வரவேற்புடன் ஓர் அரங்கில் தினமும் இரண்டு சிறப்புக் காட்சிகளும் திரையிடப்படுகின்றன. இந்தக் காட்சிகளுக்கு முன்பதிவு செய்து மற்றவர்களும் பார்க்கலாம். அந்தப் படங்கள் மற்ற நாட்களில் பிற திரையரங்குகளிலும் காட்சிப்படுத்தப்படுகின்றன. சில படங்கள் திரைக்கு வருவதற்கு முன்பாகவே இத்தகைய திரைப்பட விழாக்களில் திரையிடப்படுகின்றன, அது திரைப்பட விழாக்களின் சிறப்பம்சமாகும்.
ஒருவர் தினமும் 4 காட்சிகள் தவறாமல் பார்த்தாலும் அதிகபட்சம் 32 படங்கள் வரை தான் பார்க்க முடியும். ஆனால், 8 நாட்களில் 32 திரைப்படங்கள் என்பது எண்ணிக்கையில் அதிகமே! நான் 25 படங்களைப் பார்த்தேன்.
அவை: 1) The Locust, 2) Vera and the Pleasure of Others, 3) The Room Next Door, 4) Loveable, 5) Stormskerry Maya, 6) 35-Chinna Katha Kaadu, 7) The Village Next to Paradise, 8) The Girl with the Needle, 9) Sima’s Unfinished Narration, 10) Waves, 11) The Seed of The Sacred Fig, 12) Saturn Return, 13) Jama, 14) Kishkindha Kaandam, 15) Quiet Life, 16) Andrea Gets a Divorce, 17) Motel Destino, 18) Meiyazhagan, 19) The Best Families, 20) In the Blindspot, 21) Every You Every Me, 22) Emilia Perez, 23) Europa, 24) Fuhrer and Seducer, 25) Anora.
இவற்றில் என்னைக் கவர்ந்த படங்கள் – The Locust, The Room Next Door, Loveable, Stormskerry Maja, The Village Next to Paradise, The Girl with the Needle, Sima’s Unfinished Narration, Waves, The Seed of the Sacred Fig, Jama, Kishkindha Kaandam, Quiet Life, Andrea Gets a divorce, Meiyazhagan, Emilia Perez, Europa, Fuhrer and Seducer மற்றும் Anora.
பார்த்த 25 படங்களில் 18 படங்கள் பிடித்திருந்தன என்பது சிறப்பு தான். இதில் இந்தியத் திரைப்படங்களை விட்டுவிட்டு வெளிநாட்டுப் படங்களில் சிறந்த 6 படங்களைத் தேர்வு செய்ய வேண்டும் என்றால், இவற்றைச் சொல்வேன்:
1) The Seed of the Sacred Fig, 2) The Village Next to Paradise, 3) The Girl with the Needle, 4) Stormskerry Maja, 5) Emilia Perez 6) Quiet Life
உலகின் பல்வேறு கலாச்சாரங்களின் பகிர்வாகவே திரைப்பட விழாக்கள் அமைகின்றன.
சமூகப் பிரச்சனைகளைக் கையாண்ட படங்கள் – Stormskerry Maja, The Village Next to Paradise, The Girl with the Needle, Quiet Life, Europa.
Fuhrer and Seducer - சர்வாதிகாரி ஹிட்லரின் நாசி அரசின் பிரச்சார அமைச்சராக இருந்த ஜோசப் கோயபெல்ஸ் மேற்கொண்ட பிரச்சார உத்திகளை உண்மையான ஆவணக் காட்சிகளுடன் பொருந்தும் விதமாக வரலாற்றுப் படமாக சிறப்பாகக் கதை சொல்லப்பட்டிருந்தது.
The Village Next to Paradise – சோமாலியா நாட்டில் வாழும் சமூகத்தின் உதிரிகளின் கதையை இந்தப் படம் சொல்கிறது.
The Seed of the Sacred Fig, Kishkindha Kaandam - துப்பாக்கி தொலைந்ததால் நிகழும் பிரச்சனைகளால் பின்னப்பட்ட கதைகளாக இருந்தன.
Europa – பெரு நிறுவனத்திற்கான நில ஆக்கிரமிப்பிற்காக அல்பேனியா நாட்டில் ஒரு கிராமத்தின் பூர்வீக மக்களை வெளியேற்ற நிறுவனத்தின் பிரதிநிதி மேற்கொள்ளும் முயற்சிகளை மையமாக வைத்து எடுக்கப்பட்டுள்ளது.
Andrea Gets a Divorce மற்றும் The Best Families - Black Comedy படங்கள்.
Waves – 1968ல் செக்கோஸ்லோவாக்கியாவில் நடந்த அரசியல் விடுதலைப் போராட்டம் மற்றும் அதையடுத்து சோவியத் யூனியன் உள்ளிட்ட நான்கு நாடுகள் செக்கோஸ்லோவாக்கியா மீது படையெடுப்பு நடத்தியதை அந்நாட்டின் வானொளி அலுவலகத்தை மையமாகக் கொண்டு, கருத்து சுதந்திரம் குறித்து பேசுகிறது படம்.
Sima’s Unfinished Narration – பிரபலமான உளவியலாளரைப் பற்றிய ஒரு செய்தி சமூக ஊடகத்தில் வெளியானதால் அவரின் வாழ்வில் அது ஏற்படுத்தும் தாக்கம் பற்றிய கதை.
சிறந்த உருவாக்கம், சிறந்த திரைக்கதை அம்சம், துப்பாக்கியும் பிரச்சனையும், உறவுமுறை சிக்கல்கள், உதிரிகளின் கதை, சமூகப் பிரச்சனைகள் எனத் திருவிழாவில் படங்களின் வகைமைகள் பரவலாக இருந்தன.
பல்வேறுபட்ட மொழிகள் மற்றும் கலாச்சாரங்களின் அடிப்படையில் இந்தத் திரைப்படங்கள் வேறுபட்டு இருந்தாலும், உணர்வுகளின் அடிப்படையில் அவை நம்மை இணைக்கின்றன – அதுவே சினிமாவின் சிறப்பம்சம்.
அன்புடன்,
ஜெகன்
